هو ايه معنى المواطن والمواطنة مش عارفة بالضبط بس واضح إنه خلاص بقى هوالنهب والنصب والتهليب
انهاردة وأنا راجعة في القطر سمعت حوار ممكن نسمعه كتير عن أحوال مجتمعنا العظيم لكن أهم جملة علقت معايا مبارك خلانا كلنا ناخد
ناس بتاخد على دماغها وناس بتاخد حقها وناس بتاخد كل اللي نفسها فيه
وفي نفس اليوم وأنا مروحة عند باب الخلق عند متحف الفن الإسلامي بالضبط لقيت الإزالة مبهدلة الباعة المتجولين والضابط بيكسر ويضرب بغل أوي زي ما يكون دول مثلا أعداء للوطن لدرجة إنه جرح ناس بالعصاية بتاعته
والشباب مذعورين وبيجروا ومش لاحقين يهربوا بنفسهم ولا يلموا حاجتهم البسيطة .
تألمت جدا جدا للمشهد ده وقلت الغلابة تحاربوهم في لقمة العيش وغيرهم بيهلبوا فوق حاجتهم ويهربوا ويطلعوا من البلد كأنهم لابسين طاقية الإخفاء
يمكن ناس تقول بس هم بيشوهوا شكل البلد وبيزحموا الشوارع والحل زي ما كل الدول المحترمة بتعمل ننشئ مكان خاص بيهم وبعدين تبقى تعاقب المهملين بس مش كده برضه
عارفة إني بحلم بالمدينة الفاضلة بس كل الموضوع إني نفسي نرجع لإسلامنا
ومع كل ده بحب بلدي أوييييييييييييييييييييييييييييييييييي فوق الوصف زي ما حسين الجسمي بيقول
بحبك موووووت
ده وإنت مطلعه عيني بحبك موووت
اللهم ارفع غضبك ومقتك عنا
اللهم خذه هو وحاشيته أخذ عزيز مقتدر
هناك تعليقان (٢):
احنا لو قعدنا نعد الوحش مش نخلص
انا مبدأي في الحياة
صلح من نفسك
وانا اصلح من نفسي
والبلد ايه غير انا وانت وانت وانت
عندك حق يا شادى الوطن إيه غير أنا وأنت وأنت و.... لكن لازم ده يكون فعليًا وليس كلام فقط وفعلاًَ لازم كل زاحد يبدأ بنفسه وبيته وأولاده ولو كل واحد عمل كده يا سلااااام ، يعنى مثلاً أنا بتألم لما أمشى فى الشارع وألاقى كمية الزبالة اللى احنا المفروض بندفع فلوس علشان تتشال !!!! لو عملنا كلنا هجوم على الشركة المسئولة عن النظافة لازم ده يجيب نتيجة ولا إيه؟!
إرسال تعليق