18‏/04‏/2007

يوميات أنثى في مجتمع ذكوري ج4


نعود إلى موضوعناوالعود أحمد- مع الاعتذار لأحمد لهذا الموضوع الذي اتمنى أن أعرضه بموضوعية وأن أستطيع ايصال آرائي ومفهومي دون أي تحيز
ضل راجل ولا ضل حيطة
ضرب الحبيب زي أكل الزبيب
بما إني لا أحب الزبيب خالص لا لوحده ولا على الحلويات (بحبه بس في رز الكبسة ، وبس بقى لأن ريقي جري وأنا عاملة ريجيم وكد مش نافع)
أرى كثيرا المرأة عايشة مع زوج ليس برجل وإنما هو ذكر فالرجولة في الحقيقة ليست صفة جنسية وإنما هي صفة أخلاقية خاصة في موروثنا العربي والديني ولذلك ممكن تلاقي ست أرجل من ميت راجل وبرضه أنثى وجميلة ورقيقة
تلاقي الست مستحملة غلب وضرب وإهانة إما لأنه ضل راجل ولا ضل حيطة مع إن الحيطة أرحم وأكرم من زوج لا يغني ولا يسمن من جوع
فالزوج في رأيي هو الحب والحياة
هو الصديق والرفيق وشريك الحياة
هو الأخ والأب والإبن
وإن لم يكن هذا هو الزوج وهذا هو الزواج فلا داعي بالمرة لوجوده في حياتها لأنها بدونه ستكون أفضل كثيراً
ولا تدرك الأم التي تقول عشان خاطر أولادي أنها في الحقيقة لا تضحي بنفسها من أجلهم بل هي تضحي بنفسها وبهم من أجله هو ، من أجل أنانيته وظلمه
فنجد الابنة معقدة من الرجال والزواج
أو تبحث عن الحنان المفقود في شكل رجل كبير السن
ونجد الابن إما صورة من أبيه بغبائه وتسلطه أو ضعيف الشخصية ومنطو لشعوره بأنه لم يكن رجلا ليدافع عن أمه
أو أنها تخاف من لقب مطلقة والذي أصبح كالبعبع في مجتمعاتنا المريضة ولهذا حديث آخر

هناك 12 تعليقًا:

الربان يقول...

تحياتي

فعلا هناك فرق بين الرجوله و الفحولة..الرجولة معني شامل و متكامل لكل الصفات الجيدة في الرجل ... تبدأ من الصدق...الحنان...تحمل المسؤلية.. مرورا بنظرة ثاقبة عملية بالحياه..
و المشاركة... الرجولة ان تعي ان كرامة الزوجه هي كرامتك...

تحياتي

smraa alnil يقول...

اعتقد ان مش كل الرجال زي بعض
زي ما كل البنات مش زي بعض
علي الاقل منهم الاب والاخ والخال والعم
اي نعم كلهم احيانا بيبقوا عايزين الحرق
بس برضه لا غني عن اي حد فيهم

الراجل بيختلف في تفكيره واحساسه
زي المراة بالظبط

ومش اقدر اعمم ان البنت غلبانة او مكسورة في وط عالم ذكوري

احنا شايفين اننا نعيش عالم ذكوري
وهما شايفين ان هم عايشنين في عالم بتاعت ستات
عصر المراة

الراجل هو الاحتضان
والاختباء داخل رجولته
هو مش مجرد بنك او اله عايزة تمارس جنس علي طول
الرجولة ان تعي المراة ان الحفاظ علي كرامتها هو ان تحب زوجها

والرجولة
هي ان يعي الرجل ان كرامته تتعلق بكرامة زوجته وقد تكون اشد

خواطر شاب غاضب يقول...

ًباح الخير يا فندم
ممكن اقول رايي
بصي اولا انا حد ناقم علي المجتمع المصري قوي قوي
و شايف ان المجتمع جاهل و بيتعامل بسطحية مع امور كتيره قوي
ولو حضرتك زرتي مدونتي هتكتشفي اني بهاجم المجتمع بشكل كبير قوي
و بناقش مواضيع كتير عندا في المجتمع

سهر الليالى يقول...

احنا فعلا بنعيش فى مجتمع ذكورى وان كان الان الوضع ارحم بكتير من زمان ومانقدرش ننكر ده بصراحه اكيد اختلف عصرنا عن 50 او 100 سنه فاتوا والقوانين ايضا اختلفت يعنى دلوقتى ليكى حق الخلاص منه بعد ما كان يستحوذ على هذا الحق لسنوات لوحده كما ان حق حضانه الاولاد تغيرولم تعد المراه تعامل كسابق عهدهاولازم نعترف بكده .ثم انه على فكره هناك قله قليله مندسه من الرجال بيعترفوا بكينونه المرأه واهميتها وبيعرفوا تعبروا عن تقديرهم ليها
تحياتى

عصفور طل من الشباك يقول...

‘هلا بالناس المنورين

الربان دايما كلماتك وآرائك بتثلج صدري


سمرا أنا موافقاك جدا وبكرر زي ما قلت في الحلقات السابقة أنا مش بقول إن ده حال كل الرجال
أنا بس بنتقد أوضاع سيئة ومتخلفة وللأسف نسبتها كتير مش قليلة



أما الشاب الغاضب فحقيقي نورتني وطبعا هزور مدونتك
والمجتمع جاهل عشان حكامنا عايزينا كده عشان دايما نتلهى بلقمة العيش والمشاكل الأجتماعية والأوضاع الأقتصادية وننساهم شوية




سهر الليالي
بجد نورتيني

أنا معجبة جدا جدا بآرائك ومدوناتك
تحياتي لكم جميعا

GEBSON يقول...

انا متفق مع سهر الليالى فى رايها الام بتربى الولد على انه له حقوق اكترمن البنت وله مساحه من الحريه اكبر وانه الافضل والاحسن وده اللى بيخلى الولد يطلع انانى وناكر لحقوق الست بس ده مش معناه ان كل الرجاله وحشين
تحياتى

كراكيب عادل يقول...

انتي حد عاقل جداا

بس فية راجل بمية راجل برضو وفية راجل بنص عيل وفية ست براجل وفية ست بمية راجل وفية ست ولا تساوي ولا راجل

معادلة وحسبة برمة

الامور غير متساوية مع كل جمع بين الرجال والنساء كلهم مختلفين وشتان الفرق بينهم
بس لكل منهم سعي مختلف كل واحد في طريق مهم

زي الشمس والقمر بالظبط

Tamer Nabil يقول...

بدون تحيز

صوابع ايدك مش زى بعضها

وفى كل جنس فية العجب

لكن رسم صورة ان البت مظلومة وغلبانة والرجل وحش كاسر

دى صورة معكوسة

ومش صح

كل طرف لية حقوق وعليةواجب

لو كل طرف عرف كدة الحياة هتكون بين اى اثنين سعيدة

لكن لو حصل خل فى طرفى المعادلة هنا يحصل المشاكل

تحياتى

عصفور طل من الشباك يقول...

جيبسون وعادل وتامر
بجد نورتوني وأفدتوني بتعليقاتكم الجميلة


على فكرة أنا عمري ما قلت ولا هقول إن كل الرجالة وحشيين وكل الستات طيبيين
أنا بتكلم عن حالة مجتمع يعني نظرة منتشرة حتى لو ما كانتش في كل المستويات وفي المدونة الجاية هحكيلكم موقف سمعته يبين تفكير فئات كتيرة من الشعب ولغاية موضوع تولي المرأة القضاء من عدمه

وأرجع وأقول رجوعنا لإسلامنا الصح وتعاليمه الصح هو الحاجة الوحيدة اللي تخلي كل الناس حاصلة على حقوقها سواء رجالة وستات

أو حتى حكومة ومواطنين

شادي فايد يقول...

في مصر
كل من الاناث و الذكور
في سن الشباب
ينظر الى الطرف الاخر نظرة شهوانيه
وينسى ادمية الطرف الاخر
ولكن طبعا بما اننا مجتمع ذكوري
والبنت اي حاجة بتعملها تبقى عيب وحرام
والولد يبقى برافو عليه ولد ناصح ومفتح وروش ومقطع السمكة وديلها

فنجد بذلك ان البنت تكون مظلومة دائما وابدا

اتنين غلطو واتجوزوا
مبيعرفوش يختاروا على اسس سليمة

لو الراجل طلقها
عادي
ولا يعيبه
دا راجل ويتجوز غيرها
ويتقبله المجتمع بصدر رحب
هو الراجل بيعيبه غير جيبه

مع ان ممكن يكون هو الطرف السيء
وممكن تكون زوجته افضل منه علما
وادبا وثقافة
لا مش ممكن
دا الغالب
بما اننا مجتمع مش مثقف
فا انا اجزم بأن مستوى ثقافة البنت اعلى

وحتى لو المرأة المطلقة شالت من دماغها فكرة الجواز
برده لاتسلم من قهر مجتمعنا الذكوري لها

مظلقة وغير متزوجة
دي اكيد كذا
وكذا
وكذا

اللهم ارحمنا واغفر لنا
وارحم شبابنا من ضعفه وزله

عصفور طل من الشباك يقول...

شكرا أوي يا شادي

مش عارفة أقولك ايه

قلم حر يقول...

بصي كفاية أني أقولك أني بحلم أتزوج من رجل مثل سيدنا عمر بن الخطاب , عشان أحس أنه راجل بمعني الكلمة ..ولنفس السبب برده كل النس شايفة أني هاعنس لغاية لما الاقي عمر بن الخطاب , لان من وجهة نظره مافيش نسخة معدلة منه تناسب زمن الالفية الثالثة
للكني برده مازلت مصممة أنا عايزة عمر بن الخطاب ..عايزه راجل مش ضل حياطة , بعد ما كل الرجال راحوا في 73.