٢٩‏/٠٢‏/٢٠٠٨

دمعة


الأيام دي وبالتحديد من حوالي 3 أو 4 شهور وأنا عندي حالة غريبة مع إنها حلوة وهي إن دموعي قريبة أوي وفي أقل موقف وقدام أي حد بعد ما كنت ما أعيطش غير للشديد القوي ومش قدام أي حد لكن دلوقتي مش بيفرق معايا وما بحسش بضعف من بكائي لكن بعتبره نوع من التعبير عن المشاعر، وده مش معناه إني بقيت عيوطة يعني زي ما كانوا بيقولوا للعيال زمان ولا إني كئيبة فأنا ولله الحمد مش كئيبة خالص وما بحبش أعيش نفسي في طور الكآبة
لكني بقيت سريعة التأثر والبكاء
أشوف فيلم
Good Will Hunting
أعيط أوي مع إني شفته كتير قبل كده
أسمع ميس شلش وفيروز وعايدة الأيوبي أعيط
أكلم ماما وبابا في التليفون أعيط
أشوف ست عجوزة تعبانة ومش قادرة تطلع الميني باص أعيط
أشوف الصغار المتشردين أو المتسولين أو أطفال الشوارع أعيط
أشوف أب بيوصل بنته كل يوم المدرسة وساكن جنب الشغل وبشوفه كل يوم وهو نازل معاها وماسك إيديها أعيط
صافي أختى بتحكيلي عن ريهام صاحبتها الفلسطينية
مامتها مصرية وهي عايشة هنا أختها الكبيرة متزوجة في فلسطين وبقالهم 7 سنين ما شافوهاش وما يعرفوش ولادها
وأخيرا خدت وثيقة لم الشمل اللي بيها تقدر تخرج وتدخل فلسطين
وهي بتحكيلي بعيط
سمعت أغنية حمادة هلال محمد نبينا عيطت
وخالد عجاج بتاعت مصر فيلم طباخ الريس عيطت
أغنية ماجد المصري يا مصري عيطت
حتى أغنية كارم محمود أمانة عليك يا ليل طول بعيط
دي تلاكيك بقى
المهم إني مش حزينة ولا عندي مشكلة من دموعي دي وده الأهم

هناك ١٢ تعليقًا:

حمامة يقول...

على فكرة كتير بيحصلى كده
بس مش ف كل الحاجات دى
يعنى جملة مؤثرة ف مسلسل او فيلم
منظر متسول او حد غلبان
بس ف اغلب الوقت عينى بتدمع بس
تحس ان القلب بقى بيجرى ع الحزن
او مش عارفه هى حاجة كده

تسلمى ع البوست يا رقيقة :)

أندلس يقول...

اسمحيلي أتفاءل بالظاهرة دي جدا يا روبي
رغم ان الموضوع كله عن النكد والعياط لكن أبهجني
أصل أنا كمان بقيت كدة
عارفة امتة
لما حبيت ......(اللي بالي بالك)
إذن أنتظر بشارة عن قريب

أندلس يقول...

نسيت أقول لك ان اختيار الصورة موفق جدا

دموعك لولي يا روبتي يا اختي

عصفور طل من الشباك يقول...

ربنا يخليك لي يا أيوي يا جميلة

قبلة الحياة يقول...

يا عصفورت يا جميله

انا عايزة ااقولك اني خايفه اكتب لك تعليق لاحسن تقريه وتعيطي

بس بجد انتي جميله اوي ورقيقه اوي

وصادقه اوي

اللي دموعه قريبه من عنيه بيكون طيب اوي وحساس اوي وصادق اوي

لان الدموع زي ما بيقولوا كدا بتغسل القلب

ربنا يسعد ايامك ويهدي بالك يارب ويرزقك الخير والسعادة

تحياتي واحترامي لدموع من حبات اللؤلؤ غاليه اوي عندنا كلنا

مواطن مصري يقول...

لا حول ولا قوة الا بالله ... حرام عليكي انا كدا كنت هعيط :(
بس علي فكره الدموع بتريح اووي وبتخف الضغط الي علي الواحد

سنووايت يقول...

ممكن تكوني بتفكري كتير في حاجة معينة , او قلقانة من حاجة الضغط العصبي بيخلي الانسان سهل التأثر باي حاجة حواليه
بس عموما العياط مش وحش بس الابتسامة اجمل بكتير..
اتمني لك مع كل صباح بسمة

د/اجدع بنوته يقول...

ايه يابنتى ده

انا حسيت ان دموعك هتنهمر عليا م الشاشه

الصراحه الدموع بحسها ضعف

وميضايقنيش ف حياتى قد حد اكون بكلمه

ف اى ظرف وتحت اى ضغط فيبكى

اى نعم انا ببكى بس ورا مية جدار

ولكن طالما مبسوطه بالحاله دى

فربنا ديمها عليكى نعمه

تحياتى

غير معرف يقول...

Attention!

هبة المنصورة يقول...

روبى
بصراحة مدخلتش هنا عندك من زمان.. بس الصورة لفتت نظرى.. انتى عارفه باضعف قدام اللولى.. وباضعف قدام أى حاجه معموله بحب وبصدق.. وحشتينى أوى.. وكان نفسى أبقى جنبك ف أى مرة م المرات اللى بكيتى فيها دى.. عارفه! شكلنا لو اتقابلنا هنعيط برضه.. حضرى المناديل ويارب أشوفك قريب

عصفور طل من الشباك يقول...

نورتوني كلكم وحسيت إنكم حسيتوا بي أوي وده المهم

الناس الجداد
حمامة
قبلة الحياة
سنووايت
أجدع بنوتة

نورتوني

مواطن مصري
وبوبا القمر

فينكم من زمان

غير معرف يقول...

حاسة إني هأفقد مصداقيتي لكثر إبدائي أعجابي بكل موضوع أقرائه لك. لكنها الحقيقة. عجبني الموضوع جدا وضحكني كمان. لكن أحب أطمنك. نحسبها علامة طيبة إن شاء لله ودليل على قلب حي غض. لكنني بصراحة مش عارفة إذا جاز لنا أن نعتبر هذا إشارة لأشياء أخرى لأنني بصراحة كده طول حياتي. الفرق أن الحالة بتزيد في بعض الأوقات ليس إلا. ربنا يكرمك ويوفقك....