06‏/05‏/2007

لقاء 3


لقاء 3
كارثة التعميم

المنايفة أكثر الناس لؤما كل واحد منهم أرشان و أروبة و دؤرومة وكلام كبير جدا
الدمايطة أكثر الناس بخلا وتسمع حكاوي تقشعرلك جسمك عارفين مسلسل البخيل وأنا
الشرقاوة طيبين وسذج وكرما مش هما اللي عزموا القطر
الطنطاوية بتوع الأونطة والنصب
المنصورية أهل الجمال
الاسكندرانية مية مالحة و وشوش كالحة
المصاروة القاهريين ندالة وبتوع مصلحتهم
ثانية واحدة تعبتوا ولا ايه؟!
ده لسه النظام ده ممكن نطلع بيه لبره
الفلسطنين قلوبهم سودا وحقودييين وهما اللي باعوا أرضهم
اللبنانين عالم هايصة وبتوع رقص وغنا ومسخرة من الآخر بناتهم زي ما بتشوفهم في التليفزيون
الخليجيين أغبى خلق الله وأجلفهم
العراقيين دول عايزين حكام من حديد زي صدام شايفيين بيعملوا ايه في بعض

الهنود أكثر اللي بنتريق عليهم
أما إحنا بقى فبيتقال علينا بره أكثر أهل الأرض نذالة مع بعضهم
معلش ممكن تصبروا عليّ شوية ممكن نتكلم على العقائد والأديان
المسيحين حقوديين وفيهم سهتنة
اليهود طبعا أوحش خلق الله مش القرآن قال كده وكمان عملوا كذا وكذا مع الرسول عليه أفضل الصلاة وأتم التسليم وهم كمان بيقولوا علينا ظلمة وعنصريين

المسيحيين في المهجر بيقولوا كده وبعض اليهود كذلك
الشيعة دول بقى لا دول قربوا يبقوا كفرة مش بيغلطوا في الصحابة؟
والشيعة بيعتبروا السنة أعداؤهم الألداء


أولا معلش يا جماعة آسفة جدا لكل قاهري واسكنراني ومنصوري وطنطاوي ومنوفي ودمياطي خليجي ولبناني وخليجي وفلسطيني ومسيحي وشيعي وحتى اسمحوا لي يهودي
يا جماعة أنا بس نفسي نتعلم حاجة صغيرة أوي ما نقولش وجهة نظرنا إلا لما نتعامل أو نقرا كويس

*كل بلد وكل عقيدة وكل مذهب فيه الحلو والوحش حتى اليهود


وقبل ما أي حد يتعصب أو يفهم كلامي غلط

أنا مش بدافع عن اليهود أو الشيعة

أنا بقول خلونا بتعامل بطريقة أكثر حضارية


أمال إزاي سيدنا أبي بن كعب اسلم وبقى حبر الأمة


يا جماعة بلاش التعميم
مثلا قريت ايميل مبهج من فترة يعتب كاتبه على الأستاذ عمرو خالد أن قال
"خلافنا مع اليهود ليس خلافا مع ديانة فنحن نحترم كل الأديان وإنما خلافنا معهم على أرضنا المغتصبة"
ويحتج صاحب الايميل في حنق شديد على الداعية الشاب بقوله وهل لا خلاف بيننا وبين من عادى نبيينا وغدر به وبعهده وحاول قتله؟!! وذكرني ذلك بمشكلة الرسوم الدنماركية ومبادرة كلا من الحبيب الجفري والدكتور طارق السويدان والأستاذ عمرو خالد لعقد المؤتمر

وقيام الدنيا وقتها على الدعاة الثلاثة


لا مانع أن يكون لكل منا رأيه لكن لم لا يحترم كلا منا رأي الآخر

كلا منا يجتهد فإن أصاب فله أجران وإن أخطأ فله أجر


وقتها أثلج صدري رد فعل الدكتور القرضاوي لأنه برغم معارضته للأمر لم يقل عن الثلاثة إلا كل خير ولم يصفهم إلا بأبناءي

وهو سلوك المؤمن الحق والعالم الجليل ولا نزكي على الله أحدا



وهل لو كان خلافنا مع اليهودية كديانة كان الرسول سمح لبعض اليهود بالعيش بالمدينة كأفراد حتى بعد غدر وطرد وحرب كلاً من بني قريظة وبني النضير و بني قينقاع بل وكان منهم جاره والذي مات نبينا عليه الصلاة والسلام وبينه وبين جاره معاملات ماليه حيث رهن النبي لديه درعه

الرسول لم يطرد إلا من غدر



ليه مش بنقرا كويس قبل ما نتكلم
*الفلسطينيين باعوا أرضهم؟؟!!!!!!!!!!!
آآآآآآآآآآه
مين اللي بيقول كده مين؟ده كله تعتيم إعلامي قميء
اقروا
اقروا كتب تاريخ محترمة ومتعددة وشوفوا
لو كده يبقى كمان كام سنة هيقولوا المصريين باعوا أرضهم
انتوا عارفين إن في سينا والغردقة في بيع أراضي يتم بشكل سري لشركات أجنبية يشتبه في كونها اسرائيلية

هل الشعب الطيب المغلوب على أمره والذي لا يشغله سوى لقمة العيش يدري عن ذلك شيئا

وهل يحق لأيا كان أن يقول فيما بعد أننا قد بعنا أرضنا

وإذا كان بعضا منهم قد باع

فهل باعوها إلا بعدما أجبروا وضيقت عليهم سبل العيش وربما لم يكونوا يدرون لأي جهة يبيعون

وهل ظهور الكثير من الجواسيس لديهم يجعلهم خونة وعملاء


طب ما أحنا وبكل الحسرة طالع مننا كام جاسوس


وبرغم كل شيء اعتبرهم ضحايا لقمة العيش وظلم الحكام المبجلون


اللبنانين فيهم المحترمين والمتدنين أظن برضه شوفتوهم في برامج عمرو خالد


فيهم د.فتحي يكن ود.منى الحداد

فيهم واحد زي منير البعلبكي وكل عيلته اللي قدموا للترجمة أفضل القواميس

فيهم الجنوب الصامد حتى ولوكانوا شيعة

فيهم بنت جبيل


كفاية احتفاءهم بالراجل لدرجة إنه حكى مرة إن واحد وقف له لما عربيته عطلت ووصله وقال له قد ايه هو معجب بيه وببرامجه وبعدين في آخر الحوار يتضح إنه مسيحي

أما المسيحين المصريين

ما فيش منهم صحابنا و زمايلنا ؟!
ما فيش منهم مفكريين ومثقفين محترمين جدا جدا جدا؟!
زي الأستاذ رفيق حبيب أو الوطني المخلص مكرم عبيد
ما فيش منهم ناس من أجدع خلق الله وأكثرهم شهامة؟!

أنا منوفية

ومن أكثر الناس الذين يمزحزن بشدة في هذا الأمر

عندما أمزح مع والدي

أقول له منايفة مع بعض

حتى ابن أخي الصغير

لا بنفد من سخريتي

لكني عندما أرى الأمر يتعدى لدرجة أن يتخذه البعض نبراسا لهم

فأرى زميلتي المسيحية لا تشتري إلا من محال المسيحين

وتقول لي أنت أول مسلمة أحبها

وأجد في أصدقائي المسلمين ذلك أيضا

أقول لقد تداخل كثيرا لدى الجميع مفهوم الولاء والبراء

ما هكذا أراد منّا ديننا
وصحابي يشهدوا هل أنا ندلة ولئيمة؟
طبعا هيقولوا آه
إيمان صديقتي الطنطاوية مش أونطجية مطلقا وجدعة جدا
فينان صاحبتي الفلسطينية أحب الأصدقاء إلى قلبي منذ 10 سنوات برغم أننا لم نلتق فيهن مطلقا وبرغم أن عمر صداقتنا وقتها هو عام دراسي واحد

كنت أنا وقتها في الصف الثالث الثانوي وكانت هي في الصف الثاني الثانوي

مفيش لا حقد ولا عقد ولا تفاهات من دي
حتى الخليجين برغم من إن ناس كتير هتقول ايه حتى برغم ضيقي من أشياء كثيرة في بلادهم

بس فيهم ناس جدعين ومثقفين ومتفتحين جدا جدا
و الشيعة ليسوا كفرة

وليس من حقنا نحن العوام أن نكفر حسب ما يحلو لنا

واقروا كتب د. القرضاوي عنهم وكلامه في الشريعة والحياة وأبلغ رد بقوله ده هي الدولة الوحيدة اللي رافعة راسنا
وحتى الهنود اللي بنهري أفلامهم تريقة عندهم ديمقراطية وتكنولوجيا أحسن مننا مية مرة
المشكلة إننا بقينا في ذيل القائمة وكمان لسه عندنا عين نتريق على بعض وعلى غيرنا
والعجيب إني لقيت الموضوع ده موجود في كل الدول
في التمثليات السورية تلاقيهم بيتريقو على الحمامصة الفلاحين البدو
واللي من حلب مشهورين بالجمال
والأمريكان يعتبروا الانجليز كلهم ألاطة وبرود
والبريطانين يقولوا عليهم بدو ومرتزقة وما بيفهموش في الذوق
جوه بريطانيا تلاقي ليفر بول ومانشستر بيقولوا لا ده أهل لندن هما اللي فيهم البرود مش إحنا و لندن يعتبروا التانين فلاحين
الأمريكين بعتبروا الجنوب وبالذات فيرجينا فلاحين وهبل من أيام ما كانوا بيعاملوا العبيد كويس
والجنوب يعتبروا الشمال قساة وظلمة ومتخلفين

يا ريت نتكلم على قد المعرفة والتجربة وفي نفس الوقت بلاش أحدد انطباعي على تجربة واحدة بس
1ملحوظة
كان شعار هيئة بنت جبيل اللي كتبت عنها سابقا " أمة تقرأ هي أمة تنتصر" وفي مدونة رائعة قرأت أن الأستاذ هيكل لا يترك القراءة أبدا يضع لنفسه جدولا يحدد ساعتين قراءة يوميا على الأقل حتى أنه لم يترك هذه العادة حتى في ليلة زفافه
http://3mhammad.maktoobblog.com/?post=299102
ملحوظة 2
اتفرجوا على برنامج دعوة للتعايش عشان تعرفوا إن ديننا عايزنا نتعايش مع بعض ومع غيرنا إزاي بدون أي حقد ولا ضغائن ومع ذلك فينا عزة وكرامة وجذر ثابت في الأرض زي بالضبط ما بيقول


وعشان ما حدش يقول عمرو خالد مش موثوق منه والكلام ده

الراجل بعد حديثه عن كل إمام بيجيب شيخ متخصص في كل مذهب وبيسيبه هو يتكلم عن المذهب والإمام



وعن موضوع الشيعة عشان أوضح وجهة نظري بالضبط

أفضل إني اكتب كلمة صغيرة مخصوص

فالمفترض إن إحنا ما نطلقش الأحكام جزافا حتى ولو في شيوخ قالوا عليهم كفار


وعارفة كمان إن عقيدة أهل السنة والجماعة أن سب الصحابة كفر
بس الموضوع مش إني مع الشيخ فلان ومش مع علان ولا إنه كلام الدكتور يوسف دايما صح
الموضوع إني مقتنعة بمبدأه بتاع أنا وأخويا على ابن عمي وأنا وابن عمي على الغريب
أما عمرو خالد فأنا مش بقول رأي ليه أنا بقول اسمعوا قصة أبو حنيفة في برنامجه وشوفوا قد ايه حاور وناقش بمنتهى الأريحية كل الفئات الموجودة في عصره من خوارج وشيعة رافضة وووووووووو
انتم عارفين سيدنا علي بن أبي طالب لما سئل عن الخوارج وهم من خرجوا عليه وغدروا به وهو من هو صاحب رسول الله وزوج ابنته وخليفة المسلمين
قالوا له أهم كفار؟
قال لهم لا بل هم من الكفر هربوا
قالوا له منافقين إذن
قال المنافقين يذكرون الله قليلا وهؤلاء يذكرونه كثيرا
قالوا له إذن من هم
قال هم إخواننا بغوا علينا
أنا مش بقول هنا رأي فقهي في الشيعة
لأن الكلام عنهم كتير يعني مثلا مش كل الاثني عشرية عندهم مشكلة سب الصحابة وبالتالي دول عقيدتهم سليمة وخلافهم عننا فقهي في الفروع زي أحكام الصلاة وما شابه
وخلاف سياسي وهو إن علي أولى بالخلافة
أما موضوع اليهود وأنهم يحاربون الدين

فلا يجب علينا أن نكون كذلك

فهم قد تركوا دينهم ولم يعملوا به

ووظفوه لمصالحهم

فهل نفعل ذلك ونوظف ديننا للانتقام



في الفتوحات الإسلامية كان عمرو بن العاص في مصر أو عمر بن الخطاب يتركون للناس حرية اعتناق الدين كما لا يطردونهم من البلد المفتوحة ولا يطرد إلا من غدر أو من أراد الفتنة


" و قاتلوهم حتى لا تكون فتنة و يكون الدين لله فان انتهوا فلا عدوان الا على الظالمين" سورة البقرة


وده اللي أنا فهمته ونفسي نعمله حتى اليهود بكل مساوؤهم
فيهم فئات عادية من الشعب وبالتالي لما الخيال بيخدني وأقول لما نحرر القدس لازم ننهي الوجود العسكري والسياسي لكن فئات الشعب العادية اللي اتولدوا وعاشوا هناك وما يعرفوش ليهم وطن غيره دول نسيبهم تحت حكمنا مع ترك حرية اعتناق الدين زي ما عمل كل السلف الصالح عمر بن الخطاب أو عمرو بن الغاص مع الأقباط


بس يا جماعة هو ده كل اللي أنا عايزة أوصله بدون الدخول في تفاصيل فقهية
أما برنامج عمرو خالد وأنا مش بقول أبدا إن كل كلامه صح
وإنما الراجل عايز يقول إننا كلنا ممكن نتعايش مع بعض العرب في دول المهجر
المسلمين والمسيحين في الدول العربية
المذاهب المختلفة كمسلمين
نتعايش يعني يحترم كلا منا الاخر حتى وإن اختلفنا مع حفاظ كلا منا على هويته وعقيدته
وبالتالي ما ينفعش نتعايش مع اسرائيل لكن ممكن نتعايش مع واحد يهودي جارنا في بلدنا أو في بلد أنا عايش فيها
يا رب تكون وجهة نظري وضحت
وتحياتي
إلى إيمان
تسأني أقرب الصديقات لم تكتبين عن هذا الموضوع الآن
ولها أجيب
1موضوع التاكسي
2أول ما روحت لقيت الايميل الحانق على عمرو خالد
3بعد يومين كلمت بنت اسرائيلية على النت واستغربت لما لقيتها عضوة في منظمة مناهضة للوجود الاسرائيلي والصهيوني في فلسطين
ولما ابديت تعجبي
قالت لي أنا متعودة على ردة الفعل دي بس أنا يعمني الحق ويهمني إنكم لما تخدوا أرضكم ما تخرجونيش من وطني اللي ولدت بل وولد في والديّ

هناك 5 تعليقات:

شادي فايد يقول...

موضوع طووووووووووووويل
قووووووووووووووووووي

بس قريته كله

انا مش عارف اعلق على ايه ولا ايه

احنا ممكن نخلي عنوان البوست ده دعوة للتعايش
:)

انا عندي كلام كتير بس شايف اني مش محتاج اقوله هنا
:)
بوفر وقت بقى
ايام امتحانات
:)
:)
:)

قلمي الحر يقول...

السلام عليكم...موضوعك حلو وانا كنت قريت البوست اللي قبله وعلقت ..انا معاكي ان في كارثة بجد اسمها التعميم , ده لاننا للأسف نعشق التعميم في كل شئ , عندك مثلا لو بنا مش كويسة يقول كل البنات وحشين , ولو ولد مش محترم يبقي كل الولاد مش محترمين , ولو واحد اتسرق في محطة مصر يبقي كل المصريين حرامية ..وهكذا , لا وكمان التعميم طلع لبره , السعودييين اغبياء , والفلسطينين خونة , دى بقي دخلت فيهافي خناقة مع ناس كتير لاني قرأت في الموضوع ده , وهما مش خونة بس بيبنوا صورتهم على الفلسطينين اللي عايشين بره الاراضي المحجتاة في دول غربية ومش هماهم
القضية..انا شفت فلسطنين كتير يستاهل الواحد يتقلوهم مين اللي بيعملوه , لكن في نفس الوقت قبلت فلسطنين كتير رائعين, قيسى على كده كل حاجة
مشكلنتا بجد أننا مازالنا نطبق المثل القائل " السيئة بتعم والحسنة بتخص" وانا من اشد المعارضين لهذا المثل , لان ربنا قال لاتزر وازرة وزر اخرى ..وربنا يكفينا شر التعميم

عصفور طل من الشباك يقول...

أهلا يا علا يا صاحبة القلم الحر

فهمتيني كويس وكنت خايفة جدا إن وجهة نظري ما تتفهمش صح لأني لما كتبت قبل كده عن الموضوع ده كان كل اللي اتفهم إني بدافع عن الشيعة واليهود

تحياتي

عصفور طل من الشباك يقول...

شادي

تشريفك لمدونتي في حد ذاته هدف

ومتشكرين يا سيدي على وقتك الثمين

شد حيلك في المذاكرة يا دكتور

الربان يقول...

تحياتي

أشكرك علي الموضوع الجميل... و فعلا برنامج دعوة للتعايش من البرامج المفيدة جدا لكل سن و ثقافة و دين ، و انا من المتابعين للبرنامج.

بالنسبة للبنت اليهودية...عايز اقول ان هناك كثيرين منهم محبين للسلام...رافضين مبدأ القوة ...

تحياتي